Events

អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ (ក.ជ.ក)

រាជរដ្ឋាភិបាលកម្ពុជាបាននិងកំពុងយកចិត្តទុកដាក់យ៉ាងខ្លាំង ក្នុងការលើកកម្ពស់សិទ្ធិកុមារ ដោយបានរៀបចំគោលន​យោបាយ ផែនការយុទ្ធសាស្រ្ត ច្បាប់ និងលិខិតបទដ្ឋានគតិយុត្តផ្សេងៗជាច្រើន ដើម្បីធានាដល់ការរស់រានមានជីវិត ការអភិវឌ្ឍ ការការពារ ការលើកកម្ពស់សុខុមាលភាព និងការចូលរួមរបស់កុមារ។ការលើកកម្ពស់ការចូលរួមរបស់កុមារ គឺផ្តល់ឱកាសឲ្យកុមារបានជួបជុំ ដោយសន្តិវិធី សម្តែងមតិយោបល់ ទទួលបានព័ត៌មាន និងចូលរួមធ្វើការសម្រេចចិត្ត ដើម្បីឆ្លើយតបទៅនឹងតម្រូវការជាក់ស្តែងលើបញ្ហាដែលពាក់ព័ន្ធនឹងកុមារ ព្រោះមានតែកុមារទេ ដែលដឹងពីស្ថានភាពរបស់ខ្លួនច្បាស់ជាងអ្នកដទៃ។ ហេតុនេះហើយ បានជាក្រសួង ស្ថាប័ន ដៃគូអភិវឌ្ឍ និងអង្គការមិនមែនរដ្ឋាភិបាលជាតិ និងអន្តរជាតិ ចូលរួមបង្កើតឲ្យមានក្លឹបយុវជន ឬកុមារជាច្រើនដូចជា ចលនាយុវជនកាកបាទក្រហមកម្ពុជា និងកាយរឹទ្ធិកម្ពុជា ក្លឹបកុមារនៅតាមសាលារៀន បណ្តាញកុមារអ្នកតស៊ូមតិ ចលនាកុមារនិងយុវជនកម្ពុជាដើម្បីសិទ្ធិកុមារ ដែលពួកគេក្លាយជាចលនាយុវជន ឬកុមារឈានមុខក្នុងការកសាង និងអភិវឌ្ឍន៍សង្គម។